Көксу аудандық орталық ауруханасының перзентхана бөлім меңгерушісі ӨМІРЗАҚОВА АЙЖАН ШАЛҚАРБЕКҚЫЗЫ Алматыда Акушерлік, гинекология және перинатология ғылыми орталығында өткен «Отбасы денсаулығы - Қазақстанның болашағы» атты Қазақстан акушер-гинекологтарының I халықаралық конгресіне қатысты.
Жиынға Денсаулық сақтау министрі Ажар Ғиният қатысып, жиналғандарды құттықтады. Ол осы форумның ана мен баланың денсаулығын сақтауға бағытталған мемлекеттік саясат шараларын іске асыру шеңберінде ерекше өзектілігін атап өтті. А. Ғиният бүгінгі күні Министрлік ана мен бала денсаулығын сақтау жөніндегі тұжырымдаманы әзірлеп жатқанын, Тұжырымдаманың негізгі бағыттарын іске асыру 2030 жылға қарай халықтың саламатты өмір салтын қалыптастыруды, сондай-ақ әйелдер мен балаларға қолжетімді және сапалы медициналық көмек көрсетуге мүмкіндік беретін денсаулық сақтау жүйесін жетілдіруді қамтамасыз ететінін еске салды.
Конгрестің шеңберінде ДДҰ сарапшысы, медицина ғылымдарының докторы Тинатин Гагуа ДДҰ-ның босанғаннан кейінгі кезеңде жүктіліктің, босанудың және сапалы күтімнің оң тәжірибесін қамтамасыз ету жөніндегі нұсқаулықтары туралы айтты.
Сараптамалық талқылау бағдарламасында жүкті әйелдердегі веноздық тромбоэмболияны диагностикалау мен емдеуге, акушерлік-гинекологиялық практикадағы веноздық тромбоэмболиялық асқынулардың профилактикасына, перинаталдық асқынулар қаупін төмендетудің заманауи технологияларына және акушерліктің басқа да өзекті мәселелеріне ерекше назар аударылды.
Конгреске Қазақстанның барлық өңірлерінен 300-ден астам акушер-гинеколог және онлайн-форматта 2000 сала маманы қатысты.
