Көксу аудандық ауруханасы жанынадағы "Жастардың денсаулық сақтау орталығы" өкілдері Ақшатоған, Мұқыры және 10 жылдық Қазақстан ауылдарындағы мектепке барды. 9 - 11 сынып оқушыларымен кездесу ұйымдастырды. Басқосуға аурухананың салауатты өмір салтын қалыптастыру дәрігері, психолог және акушер маманы келді. Олар өтпелі кезеңде жүрген балаларға салауатты өмір салтын қалыптастыру маңыздылығына кеңінен тоқталды. Ақ халаттылар жаман әдеттер денсаулыққа зиян екенін ескертті.
Қазіргі қоғамда жасөспірімдер мен жастардың темекі тарту, ішімдік пайдалану, есірткіге және улы заттарға әуестілік, адамгершілікке жат мінез-құлық, ерте жыныстық қатынас белең алуда. Бұл табиғи өсімнің төмендеуіне, сырқаттанушылық және өлім-жітім деңгейі артуына әкелетінін баса айтты. Сондықтан дәрігерлер жастарды спортпен шұғылданып, салауатты өмір салтын сақтауға шақырды.